وحوش حلوان

بمناسبة الانتصارات المدوية والمراكز المتقدمة والاكتساح اللى قامت بيه جروبات حاسبات حلوان لمسابقات الـ IEEE اولها كان حصول المعيد عمرو غنيم (ذو المجد الأبدى حبيب رع :D :D ) على المركز الأول فى مسابقة ال MIE للدراسات العليا و المركز التانى جروب كيرنل (يوسف وتامر ونبيل وشريف وايهاب) لطلاب ماقبل التخرج واخيراً وليس أخراً كان حسن الختام بحصول جروبنا (فيوتكس جروب) على المركز الأول فى الـ EED افضل مشروع تخرج فى مجال الـ IT-Computer Science .. ديه قصيده كتبها شاعر الجروب الكبير احمد عماد فى اجمد كلية واجمد دفعه واحسن ناس .. اسيبكم مع القصيده هى هاتقول كل اللى عاوز اقوله للكلية.

اصحي صحصح يا تعبان

إحنا وحوش حاسبات حلوان

ولا عين شمس ولا المنصورة

إحنا الأصل وهما الصورة

والقاهرة تايهة ومكسورة

والهندسة دول في التوهان

اصحي صحصح يا تعبان

إحنا وحوش حاسبات حلوان

*****

إحنا كبار في الكود والاسم

إحنا حلولنا حلول الحسم

إحنا بنكسب من غير رسم

إحنا أوائل أي مكان

اصحي صحصح يا تعبان

إحنا وحوش حاسبات حلوان

*****

إحنا الحلم الي بيتحقق

أسطورة لكن تتصدق

لو هتغرب أو هتشرق

مين زينا هتلاقي كمان ؟

اصحي صحصح يا تعبان

إحنا وحوش حاسبات حلوان

*****

إحنا الفعل وهما كلام

إحنا عقولنا تشوف قدام

إحنا الضحكة الجاية تنام

فوق وش البلد الحزنان

اصحي صحصح يا تعبان

إحنا وحوش حاسبات حلوان

*****

إحنا الحلم بيصرخ فرحة

إحنا الضحكة بتخرج سارحة

إحنا الأرض الخضرة الطارحة

بالمستقبل للإنسان

اصحي صحصح يا تعبان

إحنا وحوش حاسبات حلوان

*****

لو هتدور مرة علينا

فوق الناس هتكون أسامينا

والأكواد طايرة حوالينا

سابقين كل الناس بزمان

اصحي صحصح يا تعبان

إحنا وحوش حاسبات حلوان

*****

أما لو راح تسأل عنا

فاسمع من غيرنا أو منا

كله هيقول انا بتمنى

لو كنت في يوم من حلوان

اصحي صحصح يا تعبان

إحنا وحوش حاسبات حلوان

*****

وبرده نقول من غير ما نهاب

إن الفوز دا والإعجاب

فضل لرب كريم وهاب

سبحان المعطي المنان

*****

رب اجعلنا بنشكر ليك

كل الخير في الكون بايديك

كل الخير منك وإليك

ياواحد يا ذا الإحسان

FuTeX

فيوتكس .. كلمة نغمها لذيذ على رأى تيمون وبومبا.....

فيوتكس .. هو الاسم الى اختارناه من اربع سنين لجروبنا , ولحد أخر يوم فيوتكس....

فيوتكس للى مايعرفش سبب التسمية هو اختصار لأكتر من جملة, اخرهم –واللى متفق عليها – هى Future Experts.

فيوتكس .. بالنسبالى هو عنوان لأفضل اربع سنين فى حياتى ولأسباب كتيره أهمها أن اعضاء فيوتكس هما أعز واغلى اصدقائى (فى الصورة من اليمين: عيسوى وجمال وأنا وسعيد وخالد وعماد -مش فى الصورة-) , ولأن تحت اسم فيوتكس كانت افضل انجازاتنا سواء على الجانب العملى من خلال المشاريع فى الكلية وسواها او على الجانب الاجتماعى فى محيط الكلية من انشطة وصداقات وعلاقات غالية صعب الواحد ينساها فى يوم من الايام.

وعن اعضاء الجروب فحدث ولا حرج , لو اتكلمت عنهم بالتفصيل هاحتاج بوست لكل واحد وده ممكن قريباً ان شاء الله بس حالياً انا هاتكلم تلخيصاً فى سطر او سطرين ومن منظور الشغل بس بمناسبة المشاريع.

نبدأ بأحمد جمال: سوبرمان الجروب ماشاء الله عليه يتحط فى اى مكان يسد اى حاجه سواء جديده او صعبه او كتيره بمجرد مايحط دماغه فيها خلاص تعتبر انتهت ونشوف غيرها.

خالد عادل: دماغ الجروب النضيفة , ماشاء الله عليه ذكى ولماح , وبيطلع المميزات ديه فى الشغل , يعنى تاخد منه اقل واحسن كود يفى بالغرض طبعاً لما تكون الغزالة رايقة :D.

احمد عيسوى: الرجل المخلص, عيسوى اكتر واحد فى الجروب من حيث عدد ساعات الشغل , عنده استعداد ماينامش ابداً طول ماوراه شغل, بيشتغل بضمير وبتفانى ماشفتش زيهم ابداً.

احمد سعيد: مصمم الجروب و صاحب اللمسات الابداعية, لمساته فى المشاريع من خلال التصاميم والشغل اليدوى , وهو مصمم ومنفذ نموذج المدينة اللى فى مشروع التخرج.

احمد عماد: رجل المواقف الصعبة , منظم ومرتب وفاهم كويس اللى بيعمله , وطبعاً اجمل حاجه فيه لما يشتغل هو وعيسوى مع بعض بيطلعوا اجمد شغل :D

مع بعض شوفنا اجمل واسعد اللحظات وعشنا نجاحات كتير جداً ومايتعدوش , اكثرهم ايام تسليم المشاريع بداية بال ACM ومروراُ بال Multimedia, OS, System Analysis, SW Package, Graphics(Battle of Tanks), MFC, DSP, Java ومسك الختام مشروع التخرج Traffic Monitoring System Model والحمد لله كان كل مشروع منهم نجاح جديد واضافة لينا على المستوى الشخصى وللجروب ككل.

اما اشهر الانجازات كانت الفترة اللى كان الجروب فيها فى اتحاد طلاب الكلية , وديه من اغلى واعز ايامنا فى الكلية والسبب ان نجاحنا فيها كان نجاح للكلية كلها على مستوى الجامعة مش بس نجاح للجروب ولله الحمد ربنا كلل مجهودنا ومجهود كل الناس اللى كانت مهتمه وتعبت بالنجاح , فى الفتره ديه اللى امتدت من 2005 الى 2007 , الكلية خدت مراكز اولى فى انشطة ومسابقات الجامعة بداية من افضل مجلة مطبوعة سنتين متتاليتين وافضل اسبوع ثقافى والمركز الاول فى مسابقة المعلومات العامة والشطرنج و بطولة كرة السلة ايضاً عاميين متتالين ومراكز تانى وتالت افضل لوحات حائط وفى الشعر والقاء.... دول وغيرهم كتير وبخلاف الانشطة اللى تمت داخل الكلية عل مدار السنتين.

و مانساش اعضاء الجروب السابقين وهما احمد مبارك وخالد عيسوى وحازم اشرف واللى افترقوا عن الجروب بسبب افتراق الاقسام, وافتراقهم كان افتراق فى الشغل بس ولايزالوا ينتمون للجروب.

طبعاً ايام وذكريات واشخاص لا يمكن يتنسوا وهايفضلوا محفورين فى الذاكره الى ماشاء الله , اتمنى من ربنا انه يجمعنا دايماً فى الخير وان ماتكونش نهاية الكلية هى نهاية فيوتكس ورغم اختلاف دروبنا الا انى متفائل خير ان شاء الله فى التواصل , وربنا يوفقنا وتستمر مسيرة نجاح فيوتكس بعد الكلية ان شاء الله.

اه نسيت قبل ماختم , لسه اعضاء فيوتكس وراهم جيش -ماعادا انا :P- يعنى لسه قدامنا كام شهر كده على مانفرح فيهم :D , انتظرونا بقى فى الفتره ديه هايكون فى مفاجاءات فيوتكساوية :D

والى لقاء قريب ان شاء الله.....