You Speak .. We Don’t Care !!

اتخذت المذيعة الشهيرة مكاناها امام الكاميرا .. وظلت تنكش فى شعرها وزينتها .. وما ان سمعت صرخة المخرج "ثرى تو وان ... هواااااا" حتى تجمدت امام الكاميرا ورسمت ابتسامة عريضه على وجهها وانطلقت:

سيداتى انساتى سادتى يسعدنا ان ننقل لكم على الهواء مباشرة فاعليات المؤتمر الدولى للشباب المصرى والذى يعقد تحت شعار "اتكلم .. اتكلم يابن الشششعب" وبرعاية السيدة الفاضلة .. حرم السيد الفاضل .. والدة البيه الصغير – حماه الله وحفظه ورعاه حتى يصير سيد فاضل هو راخر-, المؤتمر منقول على كل القنوات الفضائية ويشاهده كل سكان العالم وذلك لنقل صورة واقعية عن الواقع المعاصر.

مشاهدينا الأعزاء المؤتمر هو الأول من نوعه فى مصر والشرق الأوسط وجنوب شرق اسيا والاسكا ولن نبالغ اذا قلنا انه الأول من نوعه ايضاً على مستوى قارة انتركتيكا .. وتقام فاعلياته على جزيرة كفر الشيخ فى الساحل الشمالى وهذا بعد جدل طويل بين القائمين على التنظيم لأختيار مكان المؤتمر انتهى باستبعاد الريفيرا ولندن وسويسرا نظراً لطبيعة المؤتمر والذى يقام بهدف فتح باب الحوار للشباب المصرى الغلبان من كل الطبقات لعرض مشاكله وأراءه ولأرساء مبادئ السلام-الديمقراطية واليمقراطية-السلام ونشر الحب والحمام والزيتون بين كل ابناء القطر المصرى وكما قال الشاعر الجهبذ "الحياة حلوة بس نفهمها" وقال ايضاً "اتكلم من القلب" وهو ما استوحي منه شعار مؤتمرنا "اتكلم من القلب .. اتكلم يابن الشششعب".

وتبدأ الأن فاعليات المؤتمر باستقبال وفود الشباب المشارك وفتح باب الحوار للشباب بكل الصدق والصراحة لعرض ما يشغل بالهم.

يتقدم شاب يبلغ من العمر ارخمه –حوالى 25 سنه كده-

-"بسم الله الرحمن الرحيم, انا معتز حماده- المعادى .. صحابى بيقولولى يا زيزو, انا بالنيابة عن صحابى و صاحباتى عاوز اشكركم على المجهود الجبار ده انتوا عملتوا فينا خدمة العمر .. أول مره اصيف فى كفر الشيخ ديه طلعت تحفة .. انا مش مصدق ان مصر فيها حاجات حلوه كده .. وشكراً ليكم كتييييييييير"

-المنصة: شكراً يا معتز .. وهو ده دورنا اننا نوعى الشباب بجمال بلادهم .. وانها افضل بكتير من مصايف اوروبا .

-واحد تانى طالب المجال " هيثم شريف – المهندسين .. احنا بنعانى من مشكلة رهيبة قوى يا عمو ... شارع جامعة الدول العربية بيبقى زحمة قوى يوم الحد والبيتزا بتوصل البيت بارده .. لدرجة انى مش بعرف اكلها ومشمش كمان –القط بتاعى- بيقرف منها .. ضرورى ضرورى يا انكل تحلولنا المشكلة ديه بسرعه الله يخليك"

-المنصة: ماتقلقش يا هيثم احنا حاططين فى اولوياتنا مشاكل الشباب وفى مشروع طموح جداً لتوصيل البيتزا بالهليكوبتر وهاننتهى من تخطيطه سنة 2030 "

فجأه هجم شاب يبدو انه صعيدى من مظهره –حيث انه لا يرتدى البيبيونه- من وسط الحضور على الميكروفون وانتزعه من يد هيثم , الذى صرخ "أى أى ايدى يا همجى".

-الشاب: " عويضه محمد من جرجا .. ايه الكلام الفاضى ده مصيف ايه وبيتزا ايه .. هى ديه مشاكل يابيه امال لو سمعتوا مشكلتى هاتقولوا ايه .. انا يا بيه من طبقة غلبانة فى البلد وابويا على قد حاله مايملكش غير 200 الف فدان و 20 عمارة و3معارض سيارات بس يابيه !!! .. مش ديه مشكلتى يا بيه انا مشكلتى انى من ساعة ماجبت العربيه البى أم بتاعتى وانا مش لاقى توكيل ليها فى النجع .. ومش عارف اروش العربيه.. اشمعنى الواد صميده " واخذ عويضة يبكى بحرقة شديدة .. حتى تفاعل معه الحضور وذرفت الدموع سفاحاً على حال عويضة, وقام احد الشباب يهتف "من حق عويضه يروش زى صميده" وضجت القاعة خلفه بالهتاف.

ومن خلف دموعهم المنهمره قام ضيوف المنصة بتهدئة الحضور وناشدوا من خلال وسائل الأعلام توكيل شركة بى أم فى مصر ان يفتتح فرع فى مكز مدينة جرجا .. والا فأنهم سيقاطعوه ويخاصموه بجد بجد.

وفى نهاية المؤتمر خرجت اللجنة بتوصيات للحكومة لحل مشاكل الشباب المصرى وعدم تجاهلها ..بالأضافى الى عدد من الايجابيات اهمها نقل صورة حية عن حال الشباب المصرى .. والتواصل مع طبقات المجتمع المختلفه .. ونقد الذات بكل موضوعية.

من كواليس المؤتمر: بعد الغداء الفخم.. مال احد كبار الشخصيات على أذن معاونه وقال: " والله براوه عليك ياواد يا عبده , العيال ديه تجنن .. انت جبتهم منين؟؟ "

عبده: "من على قهوة فى بولاق .. قعدين يلعبوا طاولة ومش لاقين تمن المشاريب"

نفس الراجل احد كبار الشخصيات برضه: "ابقى شفهم بقرشين كده .. وبالذات الواد الصعيدى .. ده عجب البهوات قوى قال يروش قال .. هع هع هع" .. عبده "هع هع هع"

ملحوظة: لا يوجد اى تشابه من اى نوع بين اى شخصيات او اماكن او احداث معاصرة .. واللى مصُر على ان فى تشابه .. الكاتب –اللى هو انا- مش مسؤول عن اى شئ يحصله خاصة لو راح ورا مجرة درب التبانة –مش ورا الشمس لأن ورا الشمس اتزحم خلاص ومابقاش فيه مكان هناك-.

وحشنى كل مافيكى وانا تايه فى لياليكى .. بحس بغربة جوايا .. بحس ببرد بحس بشوق وانا خايف .. يامصر فين أراضيكى