Random Thoughts>>
To change the Universe, you have to be able to change yourself first.

Thursday, October 04, 2007

أكتوبر المجيد .. وقراصنة التاريخ

نستقبل هذه الأيام الذكرى الرابعة والثلاثون لحرب أكتوبر المجيدة .. و كالعادة فالإحتفال السنوى لا يتعدى مجموعة من الشكليات الروتينية المعتادة منذ أكثر من 20 عاماً فهى تبدأ بخبر فى الصحف قبل أيام من ذكرى الحرب عن زيارة الرئيس للنصب التذكارى تتضمن وضع أكاليل الزهور على قبرى الراحلين عبد الناصر والسادات .. وتصريحات للمشير طنطاوى عن بسالة الجيش المصرى وقدرته فى الزود عن أرض الوطن ضد أى عدوان وتبدأ الأغانى الوطنية فى التسرب الى الإذاعات على استحياء –وهى أغانى من العهد البائن أحدثهم سجل من 20 سنة- .. وتتصاعد حرارة الإحتفالات إلى ان تصل الى ذروتها يوم السادس من أكتوبر وهو كالمعتاد أجازة رسمية يمتلأ فيها جدول التلفزيون بـ 4 أو 5 أفلام عن الحرب –أحدثهم سجل من 15 سنة أيضاً- أفضلهم يحتوى على 3 مشاهد عن الحرب وماتبقى فهو تساهيل تركت لمزاج المؤلف, أما الجرائد فهى لا تختلف كثيراً عن غيرها من وسائل الإعلام فيمكن لأى قارئ أو متابع جبد ان يتوقع وبالتفصيل محتوى الصحف فى هذه الأيام فالأمر لا يختلف كثيراً من عام لأخر فهى تبدأ بالروتين المعتاد من تخصيص عدد من الصفحات تتحدث عن الحرب وذكريات المحاربين وقصائص من مانشيتاتها أيام الحرب وتتبارى كل صحيفة فى إبراز تغطيتها للحرب أنذاك .. وقد يتعدى الأمر مجموعة صفحات فتنشر الصحف والمجلات الأسبوعية ملفات خاصة بالحرب ولكن المحتوى شبه ثابت ومكرر .. ويحدث أحياناً أن تنشر بعض الصحف ترجمات لكتب أو مقالات أجنبية تتحدث عن الحرب, وقد تجد فى أعمدة الكتاب ومقالاتهم من يتحدث عن اندثار ذكرى حرب أكتوبر وضياعها عام بعد عام أو من يتحدث عن التقصير السينمائى تجاه الحرب وكالمعتاد ستجد مقال للناقد الرياضى حسن المستكاوى عن بطولات رجال الصاعقة و إبراهيم الرفاعى والفرقة 36 وغيرهم من بواسل رجال القوات المسلحة.

اعتدت دائماً انتظار ومتابعة اخبار وذكريات حرب اكتوبر كل عام فكنت اقرأ كل مايقع تحت يدى من كتب ومقالات تتحدث عن الحرب وتفاصيلها وكل عام كنت أعتقد أنى الممت بكل مايتعلق بالحرب وأنه لم يعد هناك الجديد لأعرفه ولكن دائماً ماكنت أكتشف أن هناك المزيد والمزيد لا أعلم عنه شيئاً .. فحرب أكتوبر تتعدى كونها مجرد حرب فى سلسلة لصراع العربى الصهيونى فليست هى الأنتصار العربى الوحيد فقط ولكنها أول أنتصار عسكرى حقيقى منذ تاريخ كبير .. انتصار غير الكثير من واقع مؤلم كان فى انتظارنا أو للدقة فهو أجل هذا الواقع لفتره من الوقت فأعاد ميزان القوة واسترد كثيراً مما فقدناه من هيبة واحترام للذات .. ولكن الثمن كان غالى وبٌذل من أجله الكثير والكثير.

ومؤخراً بعد أن قرأت معظم ما صدر من كتب لكتاب وقادة مصريين عن الحرب –وهى شحيحة جداً- بدأت التوسع فى قراءة ماكتب من كتب ومقالات أجنبية من خلال الأنترنت فقرأت ماصدمنى من تشويه سافر للحقائق والتاريخ .. فهناك أعداداً كبيره من الكتب والمقالات تتكلم عن الحرب من وجهة النظر الصهيونية وتتحدث عن انتصار وهمى لأسرائيل وبطولات خيالية قلبت الهزيمة الى نصر فى ثغرة الدفراسور وأجبرت المصريين على التفاوض ووقف اطلاق النار.. وأغلب الكتب والمقالات تتحدث عن كون إسرائيل هى الحمل الوديع بين براثن العرب الأوباش فهى لا تحارب إلا حفاظاً على وجودها .. ولا تستعدى على الأخرين إلا اتقاءً لشرهم .. والمصيبة ان هناك من يصدقهم بل إن الاغلبية بالفعل تصدقهم .. كثيراً ماسمعت عن اللوبى الصهيونى وقوة تأثيره وانتشاره ولكن يبدو اننا لم نقدره حق قدره فتاريخنا يشوه بأيدى قذره ونحن نكتفى بالمشاهده.

هكذا صارت ذكرى حرب أكتوبر فى أعيننا .. ففى الوقت الذى ينشط فيه قراصنة التاريخ فى كتابة مؤلفات كاملة مزيفة وانتاج افلام وثائقية موجهة للعالم كله بغرض تشويه الحقيقة .. نكتفى نحن بمجوعة من الأفلام عفى عليها الزمن نصفها مشوه والأخر لا يعرض سوى لحظات موت أحمد ذكى فى الحرب وحب محمود ياسين القديم وتمر ذكرى حرب أكتوبر وكأنها عيد شم النسيم كل مانهتم به كيف نستفيد بيوم الأجازة وإكليل زهور على قبر الراحل ودمتم.

الخلاصة:

لا أفهم سر التقصير الغريب من الدولة ومؤساساتها تجاه توثيق وتأريخ حرب أكتوبر .. ولا أعلم حتى الأن دور الوزارة المدعوة –خطأ- وزارة الثقافة ؟؟ جربت تخيل الحياة من غير وزارة الثقافة قبل كده ؟؟ انا جربت لقيت انها ولا هاتفرق حاجه معانا كل اللى هايحصل ان المجلس الأعلى للأثار هايستقل بذاته .. وغير كده ولا هانحس بأى حاجة .. اللى اعرفه ان وزارة الثقافة مسئولة عن تنمية الثقافة فى المجتمع والحفاظ على الميراث الثقافى للبلد .. حرب أكتوبر تعتبر جزء اساسى من تكويننا الثقافى .. مين فينا مش بيحس بالفخر وعزة النفس لما بييجى ذكر انتصار أكتوبر .. تخيل لو ماكنش فى حرب أكتوبر وان اسرائيل استمرت محتلة سيناء .. ياترى كنا هانبقى ازاى ؟؟

وياترى بقى وزارة الثقافة ديه عملت ايه ثقافى فى البلد ؟؟ .. انا مش بطالب انها تطور من ثقافة المجتمع .. لأ حاشا لله .. انا كل اللى بطالب بيه انها تحافظ على مانملكه من تاريخ وتدافع عنه وتقاتل ضد أى حد يحاول يشوه تاريخنا .. والطرق كتيير جداً سواء بتطوير المحتوى الموجه للنشء أو تنظيم وتشجيع مسابقات للأفلام الوثائقية والروايات والبحوث الإجتماعية عن الحرب وتأثيراتها وإقامة معارض فنية وندوات ثقافية يتكلم فيها المحاربين القدام وزيادة الإهتمام بالتوعية الشعبية علشان الذكرى ماتندثرش .. طول مابنسكت ونطنش طول مابيتمادوا فى إنتهاك تاريخنا .. ومش غريبة إنها توصل لدرجة يقولوا الهرم الأكبر ملكهم وهما اللى بنوه !!


أرقام وإحصائيات:

* عدد الكتب الأجنبية اللى اتكتبت عن نكسة 67 من منظور صهيونى 66 كتاب.

* عدد الكتب الأجنبية اللى اتكتبت عن حرب أكتوبر 48 كتاب بمعدل 1.4 كتاب كل سنة .. 80% منهم من منظور صهيونى.

* فى المقابل عدد الكتب الأجنبية اللى بتتكلم عن أنتصار أكتوبر بحياد 10 كتب.

* عدد الكتب العربية المحترمة اللى بتتكلم عن الحرب مايعدوش 6 كتب (أشهرهم: حرب الثلاثين عاما لمحمد حسنين هيكل - مذكرات حرب أكتوبر للفريق سعد الشاذلي - مذكرات الجمسي : حرب أكتوبر 1973 - وثائق حرب أكتوبر لموسى صبري).

* عدد الكتب اللى اتكتبت عن حرب زى حرب فيتنام فقط أكتر من 1200 كتاب .. أغلبهم دراسات وبحوث عن الحرب وتأثير الحرب فى المجتمع الأمريكى والفيتنامى.

* موضوع عن نكسة مناهج التعليم فى حرب أكتوبر:

http://www.rosadaily.com/print.asp?id=91&ty=

9 Comments:

  • "ومش غريبة إنها توصل لدرجة يقولوا الهرم الأكبر ملكهم وهما اللى بنوه !"

    هو انتا متعرفش دول بيقولوا كده فعلا. بيقولوا ان اللي بنى الهرم بالسخره هم قوم بنو اسرائيل اللي بعد كده جه موسي -عليه السلام- و حررهم. و بالتالي يبقوا هما اللي بنوا الهرم!

    By Blogger Mohammad Nabil Al-Aggan, at 4:14 AM  

  • -->@ Nabil
    اه عارف, الكلام ده مش جديد .. ده من أيام السادات وهما بيقولوا كده .. وده منطقى طول ماحنا ساكتين وسايبنهم يتفسحوا فى تاريخنا .. اللى هو أخر حاجه بقيالنا

    By Blogger HOssam Sadik, at 5:24 AM  

  • يا جدعان لا اله الا الله ...هو لازم نتفلسف فى كل حاجة ....يعنى ماينفعش نقول خدنا يوم اجازة وخلاص ... لازم نعد نعدد ونضرب نفسنا ميت صرمه على الزمن الى فات ....فيها ايه يعنى لما يقولو ان الهرم بتاعهم ...خليهم يقولو احنا برده ولاد الفراعنه يا راجل ومش هاتفرق معانا ....سيبهم ياخدو غزة ....برده ولا تهز شعرة فى اصغر واحد فينا.....سيبهم يكتبو عن الحرب ويقولو انهم هما الى كسبو فيها وان احنا الى خدنا على قفانا ...برده ولا هاتفرق معانا ...احنا تاريخ يابنى داحنا حتى اول ناس تعبى السمنه فى اكياس ...يبقى ده انجاز ولا لا هه ..؟؟؟؟حد يرد عليا والنبى يا جدعان


    معلش انا هاقلب جد شويه ...امبارح سمعت هيكل بيتكلم فى الجزيرة وقال بيت شعر نغشش فى دماغ العبد لله جامد قوى
    كان بيقول
    لعمرك لا بلاد تضيق باهلها ..
    ولكن احلام الرجال تضيق


    بس خلاص....ماينفعش كلام يتقال بعد كدة
    ودومتم

    By Blogger m.bazeed, at 7:20 AM  


  • يا عم صلي علي النبي

    السينما المصرية بقت كل همها انها تضحك الناس
    يا فرحتي

    كل صيف يطلع واحد ناقد يقول ده كويس اوي ان الافلام بتضحك عشان الناس تنسي الهموم الاقتصادية والاجتماعية

    بالزمة فيه كام حدث تاريخي في ال200 اللي فاتت من تاريخ مصر ممكن تتعمل فلم يوثقها... زي ما الامريكان بيعملوا لنفسهم تاريخ من لاشئ (فيلم باتريوت مثلا)

    حروب محمد علي ...
    حفر قناة السويس والاباده اللي حصلت...
    حرب 48 وازاي دارت ...

    وهكذا

    بس هوا السئوال معلش
    لو فعلا منتج ربنا هداه وقرر يعمل فلم كويس
    وصرف عليه كتير
    هل يا تري الشعب - المثقف اوي بتاعنا - هيدخل الفيلم
    ولا الراجل هيفلس بعد ما يعمله

    لا طبعا الناس هتدخل بوحة وتوحه وكتكوت وجنينة الحيوانات

    أنا فاكر اني دخلت فيلم مايكل مور فهرنايت 9/11 من تلات سنين الناس في القاعة كانوا يتعدوا علي الصابع

    By Blogger قليل من التفكير, at 4:02 AM  

  • جميل اوي البوست وفيه مجهود فعلا والاحصائيات اجمل ...
    لم اقرأ عن اكتوبر الكثير وبصدق اشعر نفس شعورك بالظبط من التاجل شبه العمدي ان لم يكن العمدي للحدث وابرازه بأفضل صورة ولكن قد تكون هذه حالة عامه لكل شيء في البلد اصابه الفساد والعطب ...
    مصر تحتاج الى اعادة هيكلة على كل الاصعدة فلا تندهش ان تكون ذكرى اكتوبر ذكرى لا تذكر ..
    لك التحية

    By Blogger osama, at 10:58 PM  

  • السلام عليكم
    بجد أنا بحسد نفسي ان بابا كان مشارك في الحرب دي وان كل سنه بيحكي لنا عن اللي شافه وعن اصحابه اللي استشهدوا قصاد عينه يعني بسمع قصص حقيقيه بجد مش كلام بيتقال وبس علشان يحسن صوره أو كلام بيتكتب وبس علشان يشوه صوره

    بالنسبه لمومضوع الافلام بجد هي حاجه تحرق الدم من أيام ماكنت في ابتدائي وباخد اجازه علشان 6 أكتوبر وبعدي كده من قدام التليفزيون هي هي نفس الافلام اللي فعلاً أهم حاجه فيها قصص الحب اللي بتعرضها وانتظار يوم الاجازه بفارغ الصبر أعتقد لو في منتج غامر بفلوسه مع انه هيدفع دم قلبه بس أعتقد ان في ناس هتحب تدخل الفيلم ده لأن في ناس نفسها تعرف حاجات كتير يمكن الشباب كمان يتكسف على دمه لما يشوف الجيل اللي قبله عمل ايه

    بالنسبه لموضوع الكتب الكلام ده بيتكتب من زمان فعلاً وبيفكروني بحاجه
    عارف كتب التاريخ اللي كنا بندرسها زمان بجد أنا كنت بكره الماده دي علشان كانوا بيخلونا ندرس حاجات نسبه كبيره منها غلط ونسبه تانيه اخفاء لحقائق كتير............. ماعلينا بقى

    الناس اللي بيكتبوا مش هما المشكله هما حرين المشكله في اللي بيصدقهم والمشكله الأكبر في اللي عارف الحقيقه ومش بيعارض وان احنا مش بنكتب وبتعدي علينا الذكرى دي كائنها لا شيء
    وزاره الثقافه بقى أنا تخيلت عدم وجودها ياراجل ده احنا هنخسر كتيير دي البلد كلها بتتثقف على حسها ... وزاره موجوده بس مش موجوده
    آسفه للإطاله

    By Blogger Rehab Mostafa, at 3:54 PM  

  • أنا برضو لاحظت الموضوع ده بالمصادفة ,كنت داخل في نقاش حاد مع واحد من انجليزي مقتنع بان اسرائيل حمل وديع و بتاع , فالمهم جت سيرة الحرب والنقاش احتد وانا رحت فاتحلك جوجل عشان أفحمه و دورت , واتفاجئت...

    أبسط شيء , عندك الويكي بيديا كل اللي مكتوب فيها منقول من كتاب كتبه مراسل اسرائيلي اسمه ابراهام رابينوفيتش.

    في موقع اسمه
    onwar
    وده بيجي في التالت في البحث عن
    war 1973
    في جوجل , الموقع مكتوب فيه بالنص كده

    "Israel's military victory in 1973 came at a heavy price of more than 2,400 lives and an estimated US$5 billion in equipment."

    عايز تتفرج علعجب , دور في جوجل على
    war 1973
    ودي أسامي أول المواقع اللي هتطلعلك
    wikipedia
    jewishvirtuallibrary.org
    onwar.com
    historylearningsite.co.uk
    adl.org

    أنا كنت صغير وساذج لم لاحظت الموضوع ده , راسلت بريد الأهرام و كام صحفي في الأهرام "ساذج بقى", ولكن أسمعت ان ناديت حيا و لا حياة لمن تنادي....

    By Blogger dr_drsh, at 7:28 AM  

  • 3andak 7a2 , ana bardo la2eet nafs el 7ekaaya di 3ala el net.

    3ala el 3omoom , ana ba7aawel 2ashoof ay (aflaam wasaa2eqeyya) 3ala el net we 2a3mellaha upload 3ala youtube.com

    By Anonymous Shifoooo, at 12:04 PM  

  • يا جماعة الحقوني انا ضابط مصري باخد تدريب في امريكا لما جيت اتكلم مع الجماعة هنا لقيتهوم بيقولولي مين قال انكم انتصرتم في 1973 ده كلام غريب جدا بس ممكن نصدقك لو جبتلنا مصدر غير عربي بيقول كده فلو حد يعرف اي مصدر يلحقني بيهههههههه ضروري انا عندي بريزينتيشن في الكلام ده وده ايميلي
    hmadaezzo30@yahoo.com

    By Blogger white-tiger, at 11:09 AM  

Post a Comment

<< Home