Random Thoughts>>
To change the Universe, you have to be able to change yourself first.

Sunday, May 13, 2007

جاسوس دوت كوم

محمد سيد صابر .. مهندس هيئة الطاقة الذرية السابق والمتهم حالياً بالتجسس لحساب اسرائيل , قضية شغلت حيز كبير من تفكيرى ولفتره مش قليله , وسبب اهتمامى الزائد بالقضية هو الطريقة اللى تم بيها استدراجه للتجسس لحساب اسرائيل.

القصة بدأت بأن المتهم – محمد صابر- كان شغال فى هيئة الطاقة الذرية من سنة 1997 وحاصل على الماجستير ودخل مجال البرمجة من خلال شهادات فى شركة صخر وسافر للسعودية سنة 2004 واشتغل هناك مدرس حاسب آلى فى كلية المعلمين , وفى خلال الفتره ديه وتحديداً سنة 1999 كان اتقدم بطلب للسفارة الاسرائيلية فى القاهرة للحصول على منحة دراسية فى تل ابيب , بغض النظر عن اسبابه اللى دفعته لكده واللى منها مثلاً اضطهاده وعدم تعيينه معيد فى الجامعة واهدار كرامته على ايد ظابط أمن دولة فى المنيا, طبعاً مبررات غريبة جدا,ً لو بالمبدأ ده كان كل واحد ابوه ضربه بالقلم يروح يشهر بأمه.

المهم ان السيناريو ده مكرر فى اغلب قصص الجواسيس الاسرائيلين ومافيهوش جديد تقريباً , الجديد فى القضية ديه هو الطريقة اللى الموساد استدرج بيها الجاسوس , المتهم كان سايب السى فى بتاعه فى مواقع التوظيف المشهورة, ومنها الموقع اللى ذكر فى التحقيق مع المتهم:
www.bayt.com
موقع مشهور جداً وكلنا تقريباً اتعاملنا معاه وانا شخصياً حاطط السى فى بتاعى عليه, طبعاً بعد ما الموساد اطلع على السى فى بتاعه وشاف سنين الخبره فى هيئة الطاقة الذرية, اتصلوا بيه من خلال شركة يابانية وهمية, وطلبوا منه انهم يقابلوه ويشغلوه معاهم وبعتولوه تذاكر وبدأت رحلة الخيانة من هنا.

كنت عاوز اركز على شوية حاجات فى القضية ديه بما انها مست مجال عملنا كمبرمجين ومهندسين كمبيوتر:

1- طريقة الاتصال اللى اوقع بيها الموساد بالجاسوس واللى اغلبنا احتك بيها من غير مايكون مقدر حجم خطورتها, بسهوله جداً ومن غير اى عمليات استخباراتية وصلوا للهدف والسبب ان الجاسوس النبيه ماكنش مقدر حجم المخاطره اللى بيعرض بلده ليها بانه ينشر معلومات بالاهمية ديه حتى لو كانت معلومات تخصه.

2- غفلة المسؤلين فى بلدنا عن اهمية مجال تكنولوجيا المعلومات فى الوقت الحالى وخطورته على مستوى الأمن القومى, احنا فى عصر المعلومات والمعلومة اصبحت مطمع الكل حتى لو كانت صغيرة, واكتر الناس اللى بيتعاملوا مع مجال تكنولوجيا المعلومات بيمثلوا كنز بالنسبه لأى جهاز مخابرات معادى , خصوصاً فى سهولة الوصول اليهم وبعدهم عن عيون الأمن التى لا تنام عن غيرهم, لك ان تتخيل اهمية مبرمج اشتغل فى برمجة نظام بسيط فى الحكومة الالكترونية زى اى سجل فى وزارة الداخلية او التموين او الصناعة او اى وزارة مهما كان حجمها, مبرمج يعرف كل كبيرة وصغيرة فى النظام وهو اللى عارف كل نقط الضعف والقوة وممكن كمان يكون سايب باب خلفى للوصول للمعلومات فى اى وقت , واحد زى ده فى بلدنا ولا ليه اى اهميه, شخص عادى قليلين جداً اللى بيهتموا بيه , بس لو لا قدر الله وقع تحت ايد جهاز مخابرات معادى هاتبقى كارثه امنية وفضيحة على كل المستويات , السؤال هو : احنا ليه مستنين الكارثة لما تحصل؟

3- انا واثق ان 70% على الأقل من شركات البرمجة والأفراد بتشتغل- او اشتغلت- فى انظمة ومشاريع على مستوى عالى جداً من الأهمية والخطورة لأمن البلد – مش شرط تكون مشاريع حربية علشان تبقى خطيرة ممكن جداً يكون برنامج التعداد السكانى او برنامج بورصة او بنك او موقع لوزارة .. الخ- , المفروض كل واحد ياخد حذره وماينشرش اى معلومات عن المشاريع اللى اشتغل فيها لو استشعر ان فيها قدر من الاهمية للبلد, مش لازم كل واحد يقول وانا مالى انا عمرى ماهخون بلدى, مش شرط يكون الجاسوس كان بيكره البلد ممكن جداً يكون بيحب البلد جداً بس نتيجة الضغط عليهم بطريقة او بأخرى اصبحوا مضطرين يسربوا اسرار بلدهم, يبقى المفروض نعمل حسابنا ومانستناش اليوم ده لا قدر الله.

أخيراً نداء للمبرمجين: بين ايديكم مستقبل البلد التكنولوجى , كل سطر وكل برنامج وكل مشروع بتنفذوه هو طوبة فى اساس بلدنا وصرح نهضتنا اللى هاتقوم على أكتافكم, اشتغلوا بضمير وتفانى وإخلاص , بأدينا ناكل عيش وخلاص زى اى واحد .. ونشتغل زى اى واحد .. ونموت زى اى واحد , بس بأيدينا برضه نكتب تاريخ جديد للبلد ديه , تاريخ يليق بأمتنا ومستقبل اكثر اشراقاً من مستقبلنا المظلم الحالى , وتذكروا قول رسولنا الكريم- صلى الله عليه وسلم- "ان الله يحب إذا عمل احدكم عملاً ان يتقنه".


// للأطلاع على تفاصيل القضية:
http://www.almasry-alyoum.com/article.aspx?ArticleID=60635
http://www.elakhbar.org.eg/issues/17158/0102.html
http://www.masrawy.com/News/2007/Egypt/Politics/April/17/investigations.aspx
http://www.almasry-alyoum.com/article.aspx?ArticleID=60636


16 Comments:

  • كالعادة
    First to read and first to comment
    انا على فكرة اول مرة اعرف ان الجاسوس ده كان مبرمج
    بس الموضوع حلو بجد
    عقبال كده ما اشوفك رئيس المخابرات العلمية في مصر
    بس ابقى سلملي ساعيتها على نور واكرم وامانة امانة تسلملي على محمود ولو مش فاضي قله خالد جايلك النهر كام يوم وراجع :d
    ومتقلقش خلاص ان شاء الله محدش هيكتب في السي في بتاعه الحاجات الجبارة اللي عملها
    ومش هقول لحد على...
    اه خلاص مينفعش
    سلام

    By Blogger khaled adel, at 12:39 PM  

  • هوة سؤال بس..أنا معاك في ان مجالنا والناس الي بتشتغل فبة مهم..و..و...و..و
    بس بغض النظر عن حبنا لبلدنا..لية ما بيعملش حد حساب لينا رغم اهميتنا..

    والله الواحد بيلتمس العذر للناس الي عايزة تسافر برة ويشتغل برة..طبعا الا اسرائيل او الاعداء..

    انا عشت برة وشفت احترام البلد لأهلها..حتى لو كانوا جهله

    عشت في الدولة الوحيدة في الخليج الي حق الاسرة الحاكمة في البترول ودخل الدولة
    100% !!!!!
    يعني لو خدوا كل حاجة محدش هيكلمهم..ودة بالقانون..ورغم كدة بص على البلد..الناس عايشة في نعيم..اذا ما تغاضينا عن ان الناس هناك مبتحبش تشغل دمغها..بس كل حاجة موجودة..تعليم كويس مجاني..الصحة الترفية السكن كل حاجة..وفوق كل دة الاحترام ..حتى في قسم الشرطة

    حتى لما حد بيسافر هناك..يحترم جدا..وبيبقى نقطة واحدة انه بيحس للأسى انه بيبني بلد غير بلدة..بس يرجع ويقول بلدي مش مدياني حقي..هتقعد تقول ما هو لو كل واحد التزم بواجباتة البلد هتتعدل..

    الرد كلمتين..الواحد..هيعيش كام مرة..وانا هبني بلدي ولا اسافر واتجوز واخلص وامضي في عمري..كلها اربعين خمسة واربعين سنة والواحد خلاص يموت..ويقعد يفكر المفروض اتجوز بدري علشان اجوز اولادي..دة نوع من التفكير..الموضوع معقد..والكلام فية كتير

    By Blogger Ahmed Mubarak, at 6:05 AM  

  • السلام عليكم ورحمة الله وبركاته
    جيت عالجرح ياحسام
    أنا متابع القضية دي من أول ماسمعت عنها وبجد متضايق أوي من اللي حصل
    مافيش أي مبرر ليه انه يطلع أسرار بلده للدولة اللقيطة اللي اسمها إسرائيل
    لكن جزء من المسئولية يقع على الدولة اللي سمحت انه يكتب في السيرة الذاتية بتاعته انه اشتغل في هيئة الطاقة الذرية
    وممكن على فكرة أي دولة معادية تاخد منه المعلومات اللي عاوزاها من غير مايحس
    وده يحصل لو عملت شركة وهمية زي الشركة اليابانية اللي جت في القصة وسألوه ايه نوعية الشغل اللي عمله أو شارك فيه لما كان في كل وظيفة من الوظايف اللي كاتبها في السيرة بتاعته
    ربنا يقدرنا ويوفقنا اننا نكون جيل مؤمن وعلى قدر المسئولية
    اللهم آمين
    والسلام عليكم ورحمة الله وبركاته

    By Blogger عبدالرحمن, at 4:12 PM  

  • ->>@Khaled
    كالعاده , هاتذلنى ولا أيه :D
    ماتقلقش اول مامسك المخابرات العلمية ليك عدى وظيفه جاهزه , اكيد انت عارف هى ايه , وظيفة منتشره فى المخابرات الأير... كمل انت بقى :P:D

    By Blogger Hossam Sadik, at 12:09 PM  

  • ->>@ Mubarak
    اولاً انا مش ضد ان حد يسافر بره اكيد ده حقه ومش عيب ولا هروب, بس اللى مش منطقى فى كلامك هو المقارنة اللى انت عقدتها بين مصر ودولة قطر, مع احترامى يعنى لقطر بس ديه لا يمكن تبقى مقارنة موضوعية على الاطلاق, عاوز تقارن مصر اللى تعدادها 100 ضعف قطر, يابنى ده معدل الزياده السكانية فى مصر سنوياً 2 مليون وكسور يعنى مصر كل سنة بتزيد 3 دول قطر من اللى انت بتتكلم عنها, و الاسره الحاكمة اللى انت مفتخر قوى بيها وبنزاهتها تقدر تقولى عملوا ايه طول تاريخهم للأمة الاسلامية او الوطن العربى –بغض النظر عن قصورهم ومنتجعاتهم الصيفية اللى فى تل ابيب وحيفا-.
    معلش يا احمد لما تحب تقارن قارن بموضوعية, مش تجيبلى دولة تاريخها نقطة فى تاريخ مصر وتقلى بيحترموا الانسان هما عندهم كام انسان اصلاً , لما يكون الاجانب نسبتهم 60% مش عاوزهم يحترموا الانسان اكيد بيحترموهم مش هما دول اللى بيحموهم من صدام حسين وامثاله؟؟
    ده كان ردى على وجهة نظرك , وعلى فكره اللى عاوز يخدم بلده ممكن يخدمها من اى مكان فى العالم, وبالنسبه لكلامك "الواحد .. هيعيش كام مرة..وانا هبني بلدي ولا اسافر واتجوز واخلص وامضي في عمري" اللى يسمعك كده يقول ان اللى بيخدم بلده ده بيموت شحات, يابنى انت ممكن تبقى عايش حياتك بالطول والعرض وبتعمل كل اللى نفسك فيه بس فى نيتك انك تنفع بلدك بأى حاجه, اقلها اخلاصك فى عملك , مش شرط يعنى تطوع فى الجيش علشان تبقى بتخدمها.

    By Blogger Hossam Sadik, at 12:11 PM  

  • ->>@ عبدالرحمن
    كلامك مظبوط انا مقتنع ان المسئولية مشتركه مابين الدولة والفرد , الدولة المفروض تولى اهتمام اكتر بمجالنا وتأمينه , والفرد لازم يكون مقدر مكانه ويكون قد المسئولية حتى لو ماحدش وضحله اهميته, مش لازم دايماً ننتظر غيرنا يوجهنا
    شكراً على مرورك وردك
    :)

    By Blogger Hossam Sadik, at 12:15 PM  

  • مع احترامي..التاريخ عمل اية؟؟..ولا حاجة مبناش اقتصاد ولا شييء..دولة اكتشغت من مئتي سنة هنخترعلها تاريخ..لحقت تعمل تاريخ..سبحان الله.انت عامل زي ما بتقول الطفل دة معملش حاجة في حياتوة..هوا لحق يكبر..ناس ملهاش تاريخ وبنت نفسنا..واحنا عندنا تاريخ ومعملناش زي المعندهمش تاريخ..دا حتى عار علينا التاريخ دة ومحنا مبنعملش بية حاجة..وبعدين عمر ما كانت الزيادة السكانية عائق..احنا الدولة الوحيدة الي بتعتبر الثروة السكانية كارثة..
    الناس برة متسميش الزيادة السكانية زيادة..بتسميها ثروة سكانية..لان السكان لما بيزيد وتم استغلالة صح من قبل الادارات العليا الاقتصاد يتقدم..بس احنا ماشين غلى الوتيرة بتاعة المية سنة مبتتغيرش..يقلك بنينا كام مصنع..طب متكمل مصانع اكتر وتشغل الناس مهو دة هيجيب دخل
    احنا المصريين كدة نسيب الموضوع ونقعد نقول مقارنة ومش مقارنة.خلاص يا عم السعودية 30 مليون..وعلى ما اتذكر حصتهم في البترول
    70%
    ومكفيين حالة شعبهم
    ولا انت مستني البلاد دية لما سكنها قدنا وبعدين تقلي ماشي..
    وبعدين علشان تعرف ان الموضوع موضوع ادارة..البترول في الخليج قرب يخلص وقدامة حوالي خمسين سنة..وبدأوا من دلوقتي عملية الاصلاح..بقت دول الخليج كلها بتحول نفسها لمراكز مالية..متهيألي انت شفت دبي عملة ازاي
    دخل مصر اكبر من قطر بأضعاف مضاعفة..والكل عارف كدة
    وبعدين تاريخ مصر مش عدل قوي..بلاش نتكلم عن مجلس الشعب والنواب
    ..وبعض الناس الكبار وفضايحهم..وأديهم مش عاملين حاجة..الي بانيين قصور تحت المية وتل ابيب شافوا حاجات شعبهم وقضوها..وبعدين عملوا الي عايزينوة..مع اعتراضي على موضوع القصور بتاعتهم طبعا..
    يا ريت رؤسأنا يكونوا زيهم..حتى والخليجيين مكفيين حاجة شعبهم مش عاجبنا وعمالين نقول ..شوف ومتشوفش..الي بيتة من ازاز..
    ..ويا ريت نبطل ناخد الموضوع بعصبية وعنصرية..ونبص من منظور عقلاني شوية..وعلشان تبقى عارف انا مصري ..وفخور اني مصري..بس مش عاجبني حال بلدي..

    By Blogger Ahmed Mubarak, at 1:04 PM  

  • ليا من غيرك يا بلدى .. ليا مين ؟؟

    ياللى علمتينى ايه معنى الحنين

    انتى اللى أرضك طيبة

    والغربة فيك قريبة

    وحنينة طول السنين

    وشرفك يا بلدى سحابة و تعدى

    وبرضه انت بلدى

    دا احنا ياما خدنا منك

    فيها ايه لو يوم نديكى

    By Anonymous Anonymous, at 1:11 PM  

  • ->>@ Mubarak
    انا هاخد اخر جملك واعلق عليها علشان باقى الكلام مجرد مجادله مالهاش داعى
    انت قلت انا مصرى وبحب بلدى بس مش عاجبنى حالها
    كلام جميل بس المشكله انه مجرد كلام , يعنى انت مقتنع ان حالها مش عاجبك وعمال تقارن بغيرها طب وانت هاتكسب ايه من كده هل هاتغيرها ؟ كل اللى بتعمله ناك بتييأس نفسك وبتحبط غيرك من غير ماتاخد بالك , ده تفكير سلبى لو كل واحد بطل فكر هو يقدر يعمل ايه اكتر مابيفكر هو ممكن ياخد ايه ماكنش ده بقى حال البلد اللى انت زعلان على حالها

    By Blogger Hossam Sadik, at 1:20 PM  

  • This comment has been removed by the author.

    By Blogger أحمد عماد, at 1:39 PM  

  • السلام عليكم ورحمة الله وبركاته
    الموضوع بجد خطير
    لكن أهم شاهد فيه هو ..هل ظلم شخص أو مؤسسة يسمحلك تظلم دينك ووطنك وأهلك
    السؤال دا للجاسوس الي مش لاقي اسم كويس اناديه بيه
    بالنسبة لمبارك
    فيا حسام ريح دماغك مبارك مش هيخلص الموضوع دا وهيكمل نقاشه المعتاد
    مبارك لو ما سكتش فاكر يوم تسلمي مسروع ال maintenance
    يوم ما ركبنا من حلوان لغاية الملك الصالح
    كنت ساعتها بعمل ايه وبنتكلم في ايه
    او بعنى اصح انا بتكلم في ايه وانتا بتسمع ؟؟
    تحب نعيده
    لو مش فاكر اسأل أحمد حسي

    By Blogger أحمد عماد, at 1:41 PM  

  • خلاص مادام كلامي مناقشة ملهاش داعي..وبترد على الحتة الي انت عايزها....مش عارف باين كلامي كان مطقي جدا وملهوش رد..ما علينا
    هرد على الحتة الي انت رديت عليها
    التفكير السلبي..انك تكرة بلدك وتقول مفيش أمل..ودة مش تفكيري..التفكير الايجابي انك تعرف بلدك موقعها اية من العالم..وتحاول ترتقي بيها فوق مستوى العالم..علشان نقول مصر احسن من قطر والسعودية وامريكا..
    مش هحط راسي في التراب زي النعام واعمل نفسي مش شايف ..وان مصر هي القوة العظمى..كدا انا تفكيري ايجابي بوجهة نظرك
    ??

    By Blogger Ahmed Mubarak, at 1:41 PM  

  • @Ahmed Emad
    انا مشفتش الكومينت بتاعك تقريبا بعتناة في نفس الوقت
    بس بجد شكرا على منطق خدوة على قد عقلوة دة..مكنتش متوقع ان تقول كدة عليا على العموم شكرا..وانا مش هرد بأي كلام بعد كدة..شكرا

    By Blogger Ahmed Mubarak, at 2:32 PM  

  • ->>@ Mubarak
    بلاش تاخد الكلام جد, عماد كان بيهزر معاك علشان يخفف من حدة الحوار مش اكتر, وبعدين انت عارفنا كويس مش مستاهله تكبر الموضوع.
    خلينا فى لب الموضوع احنا بعدنا بالمناقشه عن اصل الحوار انا بتكلم من وجهة نظر المبرمجين اللى دورهم كبير.
    يالا ماتزعلش بقى :)

    By Blogger Hossam Sadik, at 2:51 PM  

  • حاجه تحرق الدم .
    لسه كانو بيتكلمو عنو دلوقت في البيت بيتك .

    By Blogger Ahmed Essawy, at 3:38 PM  

  • ايه يا حج مبارك
    انتا خدتها جد ليه
    وأحب أوضح نقطة كمان
    دفاعنا عن الدور المصري مش دفاعا للتعصب العرقي لا ولا ينبغي لأحد أنه يتعصب إلا للإسلام وأهله
    والتعصب للشعب لمجرد العصبية ليه دا منبوذ تماما ومن دعاوي الجاهلية كما جاء في الحديث الصحيح :
    كنا في غزاة - قال سفيان مرة : في جيش - فكسع رجل من المهاجرين رجلا من الأنصار ، فقال الأنصاري : يا للأنصار ، وقال المهاجري : يا للمهاجرين ، فسمع ذاك رسول الله صلى الله عليه وسلم فقال : ( ما بال دعوى جاهلية ) . قالوا : يا رسول الله ، كسع رجل من المهاجرين رجلا من الأنصار ، فقال : ( دعوها فإنها منتنة ) . فسمع بذلك عبد الله بن أبي فقال : فعلوها ، أما والله لئن رجعنا إلى المدينة ليخرجن الأعز منها الأذل ، فبلغ النبي صلى الله عليه وسلم ، فقام عمر فقال : يا رسول الله ، دعني أضرب عنق هذا المنافق ، فقال النبي صلى الله عليه وسلم : ( دعه ، لا يتحدث الناس أن محمدا يقتل أصحابه ) . وكانت الأنصار أكثر من المهاجرين حين قدموا المدينة ، ثم إن المهاجرين كثروا بعد .
    الراوي: جابر بن عبدالله - خلاصة الدرجة: صحيح - المحدث: البخاري - المصدر: الجامع الصحيح - الصفحة أو الرقم: 4905

    ومن هنا بس نحب نبين إن نقاشنا مش للتعصب للبلد ولكن لإحقاق الحق وعلشان نوصل للب المشكلة وأصلها

    By Blogger أحمد عماد, at 12:01 PM  

Post a Comment

<< Home